Lidhur me ngjarjen e rëndë të vrasjes së vajzës nga babai e vëllai, mësohet se bashkëpunëtori i drejtësisë që rrëfeu krimin makabër është larguar nga Tirana. Pasi mori statusin e bashkëpunëtorit, ai është larguar së bashku me familjen nga Tirana, duke iu dhënë mbrojtje.
Bashkëpunëtori ka vetëm pak kohë që është liruar nga burgu, pasi u dënua me 2.8 vite si bashkëpunëtor në tentativën që Shkëlzen Buci bëri për të vrarë aktorin Mishel Prela.
Ai u arrestua në korrik të vitit 2017, me akuzën e bashkëpunëtorit, pasi Shkëlzen Buci i kishte kërkuar që të ruante, duke monitoruar lëvizjet e aktorit. Por në momentin e arrestimit, ai kishte një kërkesë për drejtësinë.
“Unë nuk do të jap shpjegime në këto momente, kërkoj nga organi i akuzës të më vendosë në dispozicion një kopje të akteve të hetimit, konformë rregullave ligjore, pasi të njihem me këto materiale jam në dispozicion të jap shpjegime”, tha ai në korrik 2017 kur u arrestua.
6 muaj më pas, në janar të vitit 2018, ai tregoi vrasjen e Eglantina Bucit nga vëllai në bashkëpunim me të atin në vitin 2012 në Malin me Gropa. Për zbardhjen e kësaj ngjarje, ai mori statusin e bashkëpunëtorit të drejtësisë.
Vrasja e Eglantina Bucit është zbardhur 8 vite pas vdekjes së saj. Familja e saj nuk e pranoi lidhjen me një djalë, duke e akuzuar 23-vjeçaren se u prishi nderin e familjes dhe për këtë aryse e vranë.
