Media italiane “Linkiesta” shkruan se Rusia ka filluar të kërkojë favore ndaj shtetit italian, në këmbim të ndihmës së dhënë për përballimin e situatës nga koronavirusi.
Sipas kësaj mediaje, përfaqësuesi i partisë italiane në pushtet “Lëvizja 5-Yje”, Vito Petrocelli ka marrë sot një letër nga homologu i tij në parlametin rus, Leonid Slutsky.
“Linkiesta” shkruan se Moska ka dërguar një faturë për ndihmën e dërguar, përfshi dhe atë ushtarake. Në letrën e dërguar, Slutsky thekson ndihmën e Rusisë për Italinë në luftën kundër koronavirusit, ndërsa i kërkon qeverisë italiane të bëjë presion mbi vendet evropiane që Brukseli të heqë sanksionet e vendosura kundër Moskës, në lidhje me çështjen e Ukrainës.
“Vendet perëndimore që e quajnë veten demokratike, kanë vendosur disa tipe sanksionesh ndaj rreth një të tetës së popullatës së botës dhe nuk kanë në plan t’i zbusin ato as edhe gjatë pandemisë së koronavirusit … Unë i bëj thirrje të gjithë politikanëve të heqin dorë nga politika destruktive e sanksioneve”, shkruhet në letrën e dërguar Petrocelli-t.
