Interi po planifikon të ringjallë edhe njëherë sulmuesin brazilian, Gabriel Barboza, ose siç njihet ndryshe, Gabigol. Oferta e radhës për lojtarin ka ardhur nga Dinamo e Moskës që kërkon shërbimet e sulmuesit, kartoni i të cilit është në pronësi të Interit.
Klubi zikaltër mësohet t’u ketë kërkuar rusëve jo më pak se 20 milionë euro për lojtarin. Një shumë që konsiderohet e lartë nga skuadra e Dinamos së Moskës që është e gatshme të ofrojë deri në 15 milionë euro për brazilianin, i cili kërkon gjithashtu një pagë vjetore prej 4 milionë eurosh në sezon. Gabigol kërkon të rikthehet edhe njëherë në Europë pas aventurës së fundit në Brazil me Flamengon.
