Gazetari investigativ Flamur Vezaj, deklaroi se videoja e vrasjes së 25-vjeçarit Klodian Rahsa, është sekuestruar që në mbrëmjen e 8 dhjetorit, kohën kur ndodhi krimi, teksa shtoi se edhe vetë kryeministri Edi Rama i ka parë pamjet. Deklarata e Vezajt u bë mbrëmjen e sotme në emisionin ”Çim Peka Live” në Syri Tv.
Ndër të tjera, Vezaj hodhi akuza të rënda ndaj policisë dhe prokurorisë për manipulim të ngjarjes së vrasjes së të riut nga efektivi Nevaldo Hajdëraj.
Sipas tij, vizitat në familjen e Rashës, bëheshin për të qetësuar familjarët e viktimës, pasi kreu i qeverisë, ish-ministri Lleshaj dhe prokuroria ishin në dijeni për pamjet.
Flamur Vezaj: ”Kjo video ka ekzistuar edhe më herët, që në momentin kur ndodhi ngjarja. Por pamjet u kyçën në kasafortë me urdhrin e prokurorit gjithashtu, sepse donin të dilnin pamjet, të bëheshin publike, për shkak të asaj që do të krijonin. Po ta mbani mend, politikanë të ndryshëm, Rama e disa të tjerë, u turrën në shtëpinë e familjes rasha, dhe kjo për faktin se ata e dinin çfarë përmbanin pamjet, i kishin parë. Ajo që më bën përshtypje është përse lind nevoja për të shpikur pistoletën e Rashës, për ta inkriminuar viktimën, kur kishin parë gjithçka. Pamjet janë parë e sekuestruar që natën e krimit, është procedurë. Të gjitha vizitat në familje u bënë për t’i qetësuar dhe që protesta të mos agravoheshin më shumë se sa u bënë. Vetë Rama e dinte se çfarë kishin pamjet.”
