Deputeti i Partisë Socialiste dhe kryetari i Komisionit Hetimor për shkarkimin e Presidentit Ilir Meta, Alket Hyseni është shprehur se Kreu i Shtetit e ka shkelur Kushtetutën dhe ligjet me të dyja këmbët.
Deklarata e Hysenit u bë mbrëmjen e sotme në emisionin ”Real Story” në BalkanWeb. Hyseni tha se Komisioni Hetimor ka mbledhur të gjitha faktet që vërtetojnë se Meta ka shkelur Kushtetutën.
Sipas tij, Meta ka ndërhyrë drejtpërdrejt te zgjedhjet e 25 prillit dhe ka ndikuar te zgjedhësit, si dhe ka intimiduar institucionet, mes të cilave edhe Gjykatën Kushtetuese, që është organi garant i Kushtetutës.
Alket Hyseni: ”Presidenti i ka shkelur Kushtetutën dhe ligjet me të dyja këmbët, në mënyrë të qëllimshme. A është hetuar në raport me shkeljet në fushën e sjelljeve. Deklaratat duhet të jenë të matura për çdo President. Komisioni e ka faktuar se ai ka shkelur Kodin Zgjedhor. Të jesh President nuk do të thotë që ke gjithë pushtetin. Presidenti nuk ka pushtet mbi ekzekutivin, mbi legjislativin, apo mbi gjyqësorin. Ndërkohë ne e kemi të faktuar, në formë të shkruar apo me deklarata, që Presidenti ka intimiduar institucionet, që është një akt i rëndë. Ka intimiduar Gjykatën Kushtetuese, që është organi garant i Kushtetutës.
Është një tërësi thirrjes, deklaratash me thirrje e me shkrim, që Presidenti i bën presion Gjykatës Kushtetuese. Është një shkresë, që nuk i drejtohet as vetë Gjykatës Kushtetuese si institucion, por 7 anëtarëve të saj, duke i kërkuar llogari pse e ka marrë një vendimmarrje të caktuar, për një çështje që Presidenti nuk kishte asnjë rol. Aq më tepër që, kur Gjykata Kushtetuese flet, gjithë të tjerët heshtin. Përtej intimidimit, pra duke iu thënë se kanë vepruar gabim, duke iu bërë thirrje të heqin dorë, madje ka shkuar deri aty sa i ka ndarë gjyqtarët në dy grupe, një pjesë të mazhorancës, dhe që iu bën thirrje të shkojnë pas Presidentit, dhe pjesa tjetër që janë me Presidentin. Në asnjë mënyrë, Presidenti nuk mund t’i drejtohet një institucioni për ta intimiduar. Akte të tilla të Presidentit janë bërë publike, dhe pikërisht kjo është rrezikshmëria”.
