Një 66-vjeçare është gjetur pa shenja jete nga i vëllai, pasi kishte ngrirë nga i ftohti ndërsa në shtëpinë e saj ishte shkëputur energjia prej një viti. 66-vjeçarja e cila banonte në fshatin Ferras të Fierit, është gjetur nga i vëllai, i cili thotë se ia kishin ndërprerë energjinë elektrike për shkak se nuk kishte patur mundësi ta paguante.
Lidhur me këtë ngjarje të rëndë, drejtori i OSHEE në Fier, Arjan Fasko, ka deklaruar e ndjera ka qenë pa kontratë energjie për më shumë se një vit, dhe se asnjë i afërm nuk ka bërë kërkesë që asaj t’i rilidhej energjia.
“Kontrata që furnizonte objektin ku pretendohet se banonte zonja, është debitore dhe ka qenë për një periudhë të gjatë. Në 2018 ka lidhur një aktmarrëveshje që e ka ndërprerë në janar të 2020, është bërë aktive në muajin mars dhe është ndërprerë sërish në tetor të 2020. Pra ka mbi një vit me kontratën e energjisë elektrike të ndërprerë. Punonjësi i OSHEE që bën leximin e matësit, ka deklaruar se është objekt i mbyllur dhe nuk jeton njeri, pasi e ka gjetur banesën të mbyllur. Nuk kemi asnjë kërkesë nga asnjë familjarë apo i afërm për lidhje të energjisë në këtë periudhë”, thotë ai.
