Kreu i Partisë Demokratike, Lulzim Basha do të mbajë brenda pak minutash një mbledhje urgjente të Kryesisë, ku pritet të vendoset se si do të vijojë protesta e opozitës së bashkuar.
Basha është parë shpesh duke komunikuar me mesazhe, por edhe me telefonata, teksa nuk i është ndarë celularit. Në një moment, kryedemokrati duket se është ndjerë paksa i lodhur, teksa është ulur përtokë, për të vijuar kontaktet nëpërmjet celularit.
Së fundmi, ai ka refuzuar të flasë për gazetarët, duke i shmangur ata. Kujtojmë se protesta e opozitës vijon prej më shumë se 5 orësh, e cila nisi te Kryeministria, u zhvendos te Kuvendi për të vijuar më tej në Drejtorinë e Policisë së Tiranës, lëvizje kjo që erdhi pas dhunimit dhe shoqërimit të sekretarit organizativ të PD-së, Sait Dollapi.
