Një 53-vjeçar, banues në Babicë të Vlorës, është denoncuar nga bashkëshortja e tij me iniciale E.N, pasi kishte ushtruar dhunë fizike dhe psikologjike mbi këtë të fundit.
Megjithatë, duket se 53-vjeçari do të përballet me një tjetër akuzë, pas kontrollit të bërë nga policia në banesat e tij.
Kështu, policia ka konstatuar dhe sekuestruar rreth 26 kilogramë lëndë narkotike Cannabis Sattiva, e gjetur në dy banesat e shtetasit Bujar Nushaj. Konkretisht, në banesën e ndodhur në fshatin Babicë kanë konstatuar brenda murit rrethues të banesës një sasi lënde narkotike Cannabis Sativa, me një peshë totale prej 12 kg e 500 gramë.
Po ashtu në banesën tjetër, të po këtij shtetasi, në fshatin Penkovë, policia ka konstatuar si edhe sekuestruar një tjetër sasi lëndë narkotike prej 13 kg e 500 gramë.
Në përfundim të hetimeve policia ka shpallur në kërkim shtetasin Bujar Nushaj, pasi ai është larguar në momentin e mbërritjes së Policisë.
Materialet iu referuan Prokurorisë në ngarkim të shtetasit të lartpërmendur për veprat penale ”Dhuna në familje”, dhe ”Prodhim shitja e narkotikëve”, të parashikuara nga nenet 130/a dhe 283/1 të Kodit Penal.
