Kryeministri në detyrë i Kosovës, Ramush Haradinaj, ka folur sërish sa i përket cështjes së taksës në “Rrugën e Kombit”.
Haradinaj vazhdon të jetë i mendimit se kjo taksë është një gabim i madh. Sipas tij, taksa i ka vendosur dënim marrëdhënieve Kosovë-Shqipëri prej 13 milionë eurosh, për qarkullimin e lirë të njerëzve e të mallrave.
“Është gabim i madh vendosja e taksës në Rrugën e Kombit, dhe e çmimit për skaner për një transportues 42 euro, dhe kjo ka rezultuar me 13 milionë euro taksë për shkëmbimet në mes të Kosovës dhe Shqipërisë. Sikurse këto 13 milionë euro t’i kishim investuar në lehtësirat e qarkullimit të ndërsjellë jam i sigurt që prej atyre 450 milionëve Shqipëria do të mund të ishte rritur shumë. Kjo tregon se ne nuk i kemi kryer detyrat e shtëpisë Kosovë – Shqipëri por përkundrazi i kemi vendosur vetës pengesa duke e fajësuar njëri tjetrin”, tha ai.
Ai foli edhe për taksën 100 % ndaj produkteve serbe dhe atyre boshnjake. Haradinaj shprehet se do të ishte shumë gabim nëse qeveria e ardhshme mendon ta heqë taksën. Sipas tij, taksën nuk mund ta heqë Kosova, por vetëm Serbia me njohjen e shtetit kosovar.
