Kryedemokrati Lulzim Basha ka postuar një video të shkëputur nga intervista për “News 24”, ku flet për akuzat e Sali Berishës që e quan besëprerë. Duke rikujtuar takimin me Berishën kur ishte vetëm 17-vjeç, Basha thotë se e vetmja besë që i ka dhënë Berishës është angazhimi pa kushte për demokracinë dhe Shqipërinë.
Pas vendimit të Lulzim Bashës për përjashtimin e Sali Berishës nga grupi parlamentar i PD-së, lideri historik të PD-së tha se vendimi i Bashës është jashtë çdo norme statutore dhe ligjore, që asgjëson PD-në si parti sovrane.
Sipas Berishës, për të marrë një vendim të tillë, Basha duhet të mblidhte kongresin e PD-së, të ndryshonte statutin dhe të vendoste një nen në statut, në të cilin të sanksionohej përjashtimi nga grupi apo drejtimi i partisë i personave që shpallen non grata nga SHBA apo vend tjetër. Berisha thekson se ky vendim është nul.
“Të vetmen besë që kam lidhur me Sali Berishën, që ditën e parë që i kemi dhënë dorën njëri-tjetrit kur kam qenë vetëm 17 vjeç, ishte për angazhimin dhe përkushtimin tim pa asnjë kusht për demokracinë, për Partinë Demokratike, për demokratët, për Shqipërinë. E njëjta besë ka qenë edhe në 2005, kur u angazhova me gjithë forcat e mia për fitoren e Partisë Demokratike, e më pas për përmbushjen e projekteve që ndryshuan njëherë e përgjithmonë Shqipërinë, të cilat i rikthyen dinjitetin shqiptarëve. Kurrë nuk ka pasur marrëveshje e as besë mes meje dhe Sali Berishës, që të shkelmonim sakrificën e demokratëve, për të mbrojtur njëri-tjetrin nëse cënoheshin interesat personale. Që pas 9 shtatorit gjithkush është shtangur nga etiketimet që Sali Berisha ka bërë ndaj meje. Natyrisht unë nuk kam ndërmend të shkel mbi vitet e bashkëpunimit me të, në të mirë të shqiptarëve dhe Shqipërisë . Besa ime është për ta dhe për çdo demokrat, siç ka qenë ditën e parë”, shkruan Basha.
