Deputeti i PD-së Enkelejd Alibeaj ka reaguar në lidhje me vrasjet e rënda që tronditën kryeqytetin mbrëmjen e së hënës. Ai e cilëson bilanc lufte vrasjen dhe plagosjen mes policëve të shtetit. Përmes një reagimi në rrjetet sociale, Alibeaj shprehet se vrasja dhe plagosja e ndodhur mbrëmjen e djeshme është alarm për sigurinë e vendit. Deputeti ka një mesazh ndaj uniformave blu, për të mos u kthyer në strehën e militantëve të padenjë për të veshur uniformën e ruajtësit të rendit e sigurisë. Për të, ngjarje të tilla duhet të jenë këmbanë alarmi për gjendjen e policisë, dhe një thirrje për të rivënë në shinat e ligjshmërisë Policinë e Shtetit.
“Breshëri armësh brenda komisiariatit, plagosje e një të ngrati prej policit të dehur dhe një bilanc lufte me të plagosur e të vrarë, këtë herë mes vet forcave të rendit! Përpos keqardhjes për humbjen e jetës, jetët e shqiptarëve janë gjithnjë e më të pambrojtura. Një alarm që PD e ka ngritur në vite. Historiku i përfshirjes së forcave të rendit në ngjarje kriminale, përfshirja në trafik droge, në mbrojtjen e kriminelëve, rekrutimet politike në policinë e shtetit e shumë të tjera, e bën situatën më dramatike dhe dëshmon edhe njëherë gjendjen e vërtetë mes radhëve te Policise së Shtetit! Organizata e Policisë së Shtetit nuk duhet të jetë as strehë e elementëve kriminalë dhe as strehë e militantëve të padenjë për të veshur uniformën e ruajtësit të rendit e sigurisë. Ndaj ngjarje të tilla duhet të jenë kambanë alarmi për gjendjen e policisë dhe një thirrje për të rivënë në shinat e ligjshmërisë Policinë e Shtetit”.
Dy ngjarje të rënda kanë ndodhur mbrëmjen e së hënës në Tiranë, ku në të dyja rastet protagoniste ka qenë vetë policia.
