Teksa kanë kaluar shumë orë ku ekipet e shpëtimit po gërmojnë për të gjetur trupat e qytetarëve nën gërmadha, nga ana tjetër disa banesa janë drejt shembjes. Lëkundjet e vazhdueshme kanë ulur rezistencën. Mësohet se rrezikon të shembet edhe objekti pranë banesës së prishur tashmë të familjes Lala, në zonën e Kënetës në Durrës.
Siç duket, lëkundjet e tërmetit të pak minutave me parë, kanë sjellë dëmtime tek shtëpia 3 katëshe e cila është pranë asaj të familjes Lala. Godina është anuar më shumë, dhe çarjet i janë thelluar, ç’ka mund të sjellë shembjen nga momenti në moment. Për fat të keq, rënia e saj mund të rrezikojë edhe një tjetër banesë ngjitur saj.
Po kështu, një tjetër pallatet rrezikon të shembet në Thumanë. Pallati është shembur nga njëra anë, ndërkohë që pjesa tjetër e mbetur në këmbë ka pësuar dëmtime serioze nga lëkundjet e ditës së sotme.
Sipas ekspertëve, aktualisht në pjesën tjetër të pallatit nën gërmadha po kërkohet për një vajzë 21-vjeçare.
Ajo është identifikuar si A. Gabili, ndërkohë që mësohet se familjarët e saj kanë shpëtuar dhe janë jashtë rrezikut për jetën.
