Dy ditë pas sherrit të bujshëm, një shpërthim me tritol ka ndodhur në lokalin e Noizy-t në Durrës. Ngjarja është shënuar rreth orës 04:00 të ditës së sotme në Durrës, në lokalin e Rigels Rajkut, të njohur si Noizy. Shpërthimi vjen dy ditë pas sherrit masiv në të cilën ishte protagonist vetë reperi me Kleviol Ahmetin. Nuk dihet nëse personat përgjegjës për vendosjen e tritolit janë të njëjtë me ato të sherrit.
Kleviol Ahmeti, i njohur si “Cllevio Serbiano” ish anëtari i The Bloody Alboz (TBA) u përfshi në një sherr të dhunshëm me reperin Noizy në datën 6 Qershor. E gjithë përplasja fizike e ka zanafillën pak ditë më parë kur shoku i Stresit, Cllevio Serbiano, publikoi një video në Tik Tok ku shante Noizy-n. Pas publikimit të videos, dyshja në fjalë kanë nisur debatet në rrjetet sociale. Pas kësaj, Cllevio i ka shkuar Noizy-t në lokal ku është rrahur nga ai dhe shokët e grupit OTR.
Ditën tjetër, Cllevio Serbiano publikoi disa video, ku shihej me lot në sy, e ku bënte me dije se reperi e kishte lënë me pasoja shëndetësore. “Nëse nuk ka heqin mpiksjen e gjakut në kokë, do të vini këtu të më merrni për te banesa. Bravo Noizy do të bëhesh vrasës”, shkroi Cllevio.
Pas sherrit, Cllevio Serbiano, emri i vërtetë i të cilit është Kleviol Ahmeti ka bërë denoncim në polici. Noizy dhe babai i tij do të hetohen në gjendje të lirë.
