Viti i ri ka nisur me një bilanc tragjik, pas dy aksidenteve dje me tre viktima, dy aksidente të tjera janë shënuar mëngjesin e sotëm në Durrës. Policia bën me dije se një makinë që drejtohej nga një 22 vjeçar me iniciale M.A. ka përplasur një të mitur.
Në njoftimin zyrtar thuhet se ngjarja ka ndodhur në Arapaj. Menjëherë policia ka vënë në pranga të riun ndërsa i mituri me iniciale E.S 10 vjeç është dërguar në spitalin e Durrësit. Pasi ka marrë ndihmën e nevojshme mjekësore ai është larguar për në banesë.
Ndërsa aksidenti tjetër ka ndodhur në aksin rrugor Katër Rrugët e Fllakës, në Sukth. Sipas policisë shtetasi me iniciale N.K, 46 vjeç, nga Xhafzotaj është arrestuar pasi drejtonte mjetin në gjendje të dehur. Ai është përplasur me një tjetër makinë, që ishte e parkuar duke shkaktuar dëme materiale.
Materialet i kaluan Prokurorisë së Rrethit Gjyqësor Durrës për veprime të mëtejshme.
