Armand Duka, president i Federatës Shqiptare të Futbollit i cili fitoi mandatin e katërt pak kohë më parë është rikthyer të flasë për dy çështjet më të nxehta të momentit në futbollin shqiptar. Dënimin e Skënderbeut nga UEFA me 10 vite pezullim dhe 1 milionë euro gjobë, por edhe për jehonën që mori vendimi i gjykatës për të mos regjistruar rezultatin e zgjedhjeve të 7 shkurtit.
Duka ka sqaruar se ky vendim nuk hedh poshtë zgjedhjet, por thjeshtë duhet të plotësojmë disa dokumente shtesë të cilat po bëhen gati, ndërsa për dënimin e Skënderbeut ai e la në dorë të klubit dhe UEFA-s, e u shpreh se për korçarët nuk do të ketë më dënim në kampionatin shqiptar.
Në një intervistë për Top Channel, presidenti Armand Duka flet për gjithçka po ndodh. “Na kanë kërkuar disa dokumente shtesë, që ne po i bëjmë gati. Nuk ka asgjë kaq të madhe sa është bërë, e sigurisht nuk do të ketë asnjë ndryshim”, tha Armand Duka.
Pavarësisht regjistrimit në gjykatë apo ankimimit të rivalit të tij, presidenti Duka kujton edhe njëherë vlerësimin që iu bë këtij procesi zgjedhor nga organizmat europianë dhe botërorë, si UEFA dhe FIFA.
“UEFA dhe FIFA kanë pasur një vlerësim maksimal për këto zgjedhje, menjëherë pas përfundimit të tyre. Madje, edhe bashkëpunimi i tyre vazhdon. Brenda këtij viti do të vijë në Tiranë edhe presidenti i FIFA-s, Gianni Infantino për të parë projektet tona”, tha më tej Duka.
Lajmi më i bujshëm i ditëve të fundit ka qenë dënimi i Skënderbeut me 10 vite pezullim nga aktivitetet ndërkombëtare, si dhe një milion euro gjobë, penalizimi maksimal që parashikon Kodi i Disiplinës dhe Etikës së UEFA-s.
“Më vjen keq. Ky është një lajm i rëndë për klubin dhe vet futbollin vendas. Nëse këto janë të faktuara, atëherë drejtësia të bëjë punën e saj, ndërkohë që nëse jo, klubi duhet të gjejë rrugën për t’u mbrojtur”, deklaroi Duka.
Gjithsesi, edhe nëse vendimi i UEFA-s për të dënuar Skënderbeun do të mbetet në fuqi, ai nuk do të ketë asnjë efekt në kampionatin vendas.
“Ne e kemi marrë njëherë vendimin për ta dënuar Skënderbeun. Vendimi i UEFA-s nuk na detyron neve që ta dënojmë sërish”, u shpreh Armand Duka.
Ndërkohë, sa i përket kampionatit vendas, presidenti Armand Duka ka kërkuar më tepër bashkëpunim nga kubet, duke mos ushtruar kaq shumë presion për çdo vendim të gjyqtarëve, gabim ose jo. Sipas tij, vendimet e tyre nuk kanë ndikuar aspak në klasifikimin aktual.
Në përfundim të intervistës, Duka nuk lë pa prekur edhe problematikën e Kombëtares, ku mungojnë lojtarët dhe aktivizimi i tyre nëpër klube është minimal.
“Më vjen keq, por ky është një moment shumë i vështirë për futbollin tonë. Unë mendoj se, më mirë të luajnë lojtarët që aktivizohen, edhe pse luajnë në kategori më të ulëta, sesa lojtarët që luajnë në kampionate të mëdha, por nuk aktivizohen”, deklaroi kreu i FSHF-së.
