Këngëtari Arkimend Lushaj, i njohur me emrin e artit si Stresi, është shprehur se po ndiqet nga policia pa asnjë arsye, vetëm se ka bërë deklarata për kryeministrin Edi Rama.
Në një video-live në rrjetin social Instagram, Stresi ka treguar se nuk ndodhet në Shqipëri, por ai ka parë nga kamerat e pallatit të tij se po ndiqet nga shumë policë e përgjues, por kjo sipas Stresit është e kotë, pasi nuk do mund ta kapin dot kurrë. Ai ka thënë se nuk ka bërë asgjë të paligjshme gjatë protestës ku ka vetë qenë organizatori.
Sa i përket fjalëve se Stresi i ka kërkuar falje policisë, ai e ka mohuar kategorisht këtë, duke thënë se nuk ka asgjë për të kërkuar falje.
“Që ta dijë i gjithë populli shqiptar përse po përndiqem prej policisë është vetëm prej kryeministrit. Një kryeministër që merret me një person dhe që ka shtetin në dorë është shumë e lehtë. Por mos harro ka me ardhur dita e 25 Prillit dhe ka me ua kthye dhe kemi me ju shfaros prej tokës ditën e zgjedhjeve. Mbajeni mend, kemi me ju shfaros o komunista.
Unë nuk i kërkoj falje askujt. Kur të jem gabim kërkoj falje siç i ka hije burrit dhe djalit. Unë i kam vëllezërit e mi nëpër çdo cep të Shqipërisë dhe kanë me dalë për çdo protestë si me qenë dhe unë aty. Arkimed Lushaj nuk është tërhequr prej kauzës së vet. Me dasht kthehem kur të dua se nuk i kam bërë asgjë askujt, por kam informacionet e mia se si është duke më përndjekur policia.
Nuk dua t’i bie në dorë shtetit se shteti don të më rrahi, don me më vra, të gjitha t’i bën shteti me dasht. Me ia bër një njëriu që është qytetar si puna ime. Policia ka qef me më rraf e sakatue. Fantazma nuk kapet”, tha Stresi.
