Ish-ministrja e Jashtme e Greqisë, Dora Bakojani, ka kërkuar nga qeveria veprime konkrete për mbylljen e çështjes për kufirin detar me Shqipërinë.
Ajo thotë se Greqia duhet t’i dërgojë një mesazh të qartë Shqipërisë për zgjerimin e kufirit të saj detar me 12 milje.
Sipas saj, bllokimi i negociatave nga Franca për Shqipërinë, i jep Greqisë mundësi shtesë për marrëdhëniet e saj me të.
“Greqia duhet të shfrytëzojë mundësitë që paraqiten aktualisht dhe të përpiqet të përfundojë marrëveshjet e demarkacionit të zonës ekskluzive ekonomike detare me Shqipërinë, Egjiptin dhe Italinë.
Vendimi i Francës për të bllokuar perspektivën e pranimit evropian të Shqipërisë dhe Maqedonisë për momentin i jep Greqisë një mundësi shtesë për marrëdhëniet e saj me Shqipërinë. Mendoj se me Shqipërinë mund të jepet një mesazh i qartë, politika jone tregon dobësi në këto momente. Duhet të bëhen veprime konkrete, 12 milje me Shqipërinë, 12 milje tani. Koha nuk është në avantazhin tonë”, tha ajo.
