Një konflikt që ka nisur në prag të zgjedhjeve të 25 prillit ndërmjet kryebashkiakut socialist të Vlorës, Dritan Leli dhe kryeministrit Rama, ka shkaktuar dhe vijon me po kaq intesitet të shkaktojë zhurmë.
Prishja e marrëdhënies mes palëve nisi kur Leli refuzoi kërkesën e kryetarit të Partisë Socialiste, që ai të bëhej pjesë e listës së kandidatëve për deputetë. Ai refuzoi dorëheqjen si kryebashkiak për t’u angazhuar si përfaqësues i popullit në Kuvendin e Shqipërisë. Këshilli Bashkiak i Vlorës, ka kërkuar një mbledhje jashtë radhe me kryetarin e bashkisë, pasi sipas tyre, situata e shërbimeve vendore është alarmante.
Ata ftuan në mbledhje deputetët e Vlorës, përfshirë edhe kryeministrin Edi Rama. Dritan Leli nuk ka marrë pjesë në dy mbledhjet e fundit të Këshillit Bashkiak të Vlorës, me argumentin se po respekton masat anti-COVID. Në kundërpërgjigje, Ministria e Shëndetësisë ka aprovuar kërkesën e tij, duke dhënë ‘OK’ që të mbahen mbledhje fizikisht. Kjo përgjigje nga zv. ministrja Mira Rakacolli vjen pasi Sekretari i Këshillit, Agron Gjipali, ka kërkuar një konfirmim mbi ligjshmërinë e realizimit të mbledhjes fizike në sallën e Teatrit “Petro Marko”.
Ministria e Shëndetësisë ka dhënë aprovimin, për të lejuar grumbullimin e Këshillit Bashkiak të Vlorës për ‘gjyqin publik’ ndaj kryebashkiakut Dritan Leli. Vetë zëvendësministrja e Shëndetësisë, Mira Rakacolli, ka bërë me dije se mbledhja mund të zhvillohet edhe brenda ambienteve të mbyllura, duke qenë se Vlora është në një situatë epidemiologjike të mirë, pa asnjë rast me COVID-19.
“Përsa i përket Urdhrit të Ministres së Shëndetësisë ‘Për ndalimin e grumbullimeve në vende të mbyllura apo të hapura’ qëllimi ka qenë ndalimi i grumbullimeve të posaçme, që sikundër përmendet në urdhër lidhet me tubimet, konferencat, mbledhjet partiake, ceremonitë festive etj, ku rreziku i transmetimit të virusit është shumë i lartë. Përsa më sipër, ky urdhër nuk cenon aktivitetin e Këshillit Bashkiak, pasi zhvillimi i mbledhjeve është vijimësi e punës së Këshillit Bashkiak, një praktikë që përdoret edhe nga institucione të tjera që punën e tyre e mbështesin mbi organe kolegjiale. Sot Vlora paraqet një situatë epidemiologjike të mirë, pa asnjë rast Covid. Sigurisht, këto mbledhje duhet të zhvillohen në përputhje me protokollet anti-Covid të miratuara, si respektimi i distancës, mbajtja e maskës, kushtet higjeno-sanitare etj”.
