Tërmeti 6.4 ballë që ra në mëngjesin e 26 nëntorit ka lënë pasoja të konsiderueshme në vend. Dhjetëra persona kanë humbur jetën ndërsa me qindra të tjerë janë plagosur.
Drejtori i Emergjencave në Bashkinë Tiranë, Erind Bejko, tha se për momentin vëmendja është e përqendruar në Durrës për shkak të situatës së rëndë.
I ftuar në programin “Historia ime” në Tv Klan, Bejko u shpreh se edhe në Tiranë ka dëme të mëdha në banesa. Sipas tij, problem më emergjent në kryeqytet përbëjnë shtesat e godinave.
“Po diskutojmë për Durrësin, Thumanën dhe për Tiranën. Duke qenë se në Durrës kemi pasur fatalitete, viktima, sigurisht që vëmendja, ndihma jonë domethënë kolegu im që punon në Tiranë ishte në Durrës dje. Ambulanca që ka Emergjenca Civile ishte në Durrës dje. Ekipi i vullnetarëve, që është ekipi ynë, ishte në Durrës dje. Sepse në një situatë të kësaj natyre prevalon jeta e njeriut. Domethënë ndodh një tërmet, përmbytje, zjarr, e para njëherë jetët e njeriut. Kemi jetë të humbura apo s’kemi jetë të humbura. Nga ora 4 deri në orë 6 në Tiranë ne kuptuam që s’kemi jetë të humbura dhe fokusi jonë u çua në Durrës. Por në Tiranë kemi dëme të mëdha në ndërtesa, nga pikëpamja konstruktive, në shtëpi private, në pallate. Deri tani nuk kemi dëme të konsiderueshme në godina publike dhe ky është lajmi i mirë, në çerdhe, kopshte, shkolla. Në Tiranë kemi 157 pallate të dëmtuar të cilët ju nënshtruan një vlerësimi në tërmetin e 21 Shtatorit, por do t’i ri-nënshtrohen një vlerësimi me ekspertizë të thelluar për të kuptuar mbajnë apo s’mbajnë.. Problem shumë i madh në qytet, që është realisht emergjent, janë shtesat”, tha ai.
Kujtojmë se në mbledhjen e qeverisë që u mbajt sot në mëngjes, u vendos gjendje e jashtëzakonshme në Durrës dhe Tiranë.
