Drejtoresha e Institutit të Shëndetit Publik, Albana Fico ka folur në lidhje me gjendjen e personave të infektuar nga koronavirusi në vend.
E ftuar në emisionin “Real Story” në News24, Fico tha se një tjetër i infektuar nga Covid-19 është drejt shërimit. Sipas saj, ai ka rezultuar negativ pas ritestimit.
Kujtojmë se ky është pacienti i dytë që rezulton negativ, pas ritestimit për koronavirus.
“Këtu ka një lajm të mirë sepse një nga gjërat që më bën optimiste është fakti se ne kemi filluar të ritestojmë, dy prej tyre kanë rezultuar negativë. Nesër do vijojmë. Po rritet numri i testimeve tek ata që janë të prekur”, tha Fico.
Numri i të infektuarve nga koronavirusi në Shqipëri ka shkuar në 64, ndërsa 2 prej të infektuarve kanë humbur jetën.
Sot u konfirmuan edhe 5 raste të reja: tre shtetas italianë, një 80-vjeçar dhe një 42-vjeçar nga Kavaja.
