Prokuroria e Posaçme anti Korrupsion (SPAK), ka kërkuar heqjen e pezullimit të gjykimit për ish-ministrin e Mbrojtjes, Fatmir Mediu. Ndërkohë, ditën e sotme, është caktuar relatori i çështjes që do të shqyrtojë kërkesën për gjykimin e tij, dhe ai është Ilir Panda.
Mësohet se çështja do të shqyrtohet nga tre gjyqtarë të Gjykatës së Lartë. Më 6 maj, SPAK kërkoi rihapjen e procesit gjyqësor ndaj ish Ministrit Mediu, lidhur me shpërthimin e ndodhur 13 vite me parë në një depo ushtarake në Gërdec, ku humbën jetën 26 persona, mes të cilëve dhe fëmijë, ndërsa mbi 250 të tjerë u plagosën.
SPAK u vu në lëvizje, pikërisht pas kërkesës së prindërve të 7 vjeçarit Erison Durdaj, një prej viktimave të shpërthimit.
Ish ministri I Mbrojtjes nuk u gjykua kurrë për ngjarjen , madje ai nuk u thirr as dëshmitar në procesin gjyqësor që u zhvillua, ndaj një numri personash të përfshirë, që nga ushtarakë deri te biznesmenë të angazhuar në çmontimin e municioneve.
Ndaj tij u zhvilluan hetime, dhe Prokuroria e Përgjithshme, një vit pas shpërthimit, në mars të vitit 2009, ngriti akuzat e “Shpërdorimit të detyrës” kryer në bashkëpunim, dhe “Shpërdorim i detyrës” në bashkëpunim me subjekt ushtarak-kuadër komandues, duke e çuar çështjen në Gjykatën e Lartë.
Por 6 muaj më vonë, Kolegji Penal i kësaj Gjykate vendosi pushimin e çështjes, duke qenë se në gusht të atij viti, Mediu kishte rimarrë mandatin e deputetit, duke rifituar kështu dhe imunitetin. Prokuroria e Përgjithshme nga ana e saj nuk i kërkoi më parlamentit heqjen e imunitetit për zotin Mediu, dhe në këtë mënyrë, dosja nuk u rihap asnjëherë, pavarësisht përpjekjeve të vazhdueshme të familjes Durda.
