Drejtësia shqiptare pritet të rihapë dosjen e vrasjeve më 21 janar 2011. Prokuroria e Tiranës ka rihapur çështjen për vrasjen e Aleks Nikës me datë 21 janar 2011 në sheshin para Kryeministrisë.
Procedimi penal ka nisur para 1 muaji, dhe përveç vrasjes së Nikës, prokuroria është duke hetuar edhe plagosjen e dy protestuesve.
Hetimi për vrasjen e Aleks Nikës u pezullua disa vite më parë, dhe kurrë nuk u provua se me çfarë arme u qëllua dhe kush e vrau atë. Me rinisjen e hetimit, pritet që prokuroria të kërkojë riekspertim për armët që shtinë mbi Nikën dhe protestuesit e tjerë.
Në janar të këtij viti, qeveria dha sinjalet se mund të tentojë rihapjen e dosjes. Policia e Tiranës ka dorëzuar një kërkesë në prokurori, ku kërkon riekspertim hetimor për vrasjen e Hekuran Dedës dhe Aleks Nikës.
Sipas informacioneve, policia ka kërkuar të kryhet riekspertim i predhës së gjetur në trupin e Aleks Nikës, të ripyeten personat që kanë dijeni, kryesisht ish-efektivë dhe efektivë të Gardës që ishte në shërbim në datën 21 janar. Gjithashtu në letër-kërkesë kërkohet të ripyeten të afërm të viktimave dhe dëshmitarë.
Vrasja e Nikës është më e mistershmja e “21 janarit”. Fillimisht ai mbeti i plagosur dhe u dërgua në Turqi ku dhe ndërroi jetë. Akti i ekspertimit datë 5 maj 2014 vërteton se Nika u qëllua me një plumb.
Kjo predhë është ekzaminuar edhe në laboratorin e FBI Virginia, ku thuhet se ka dalë nga një pushkë me 6 viaska, por predha nuk mundi të identifikohet nëse është qitur nga tytat e pistoletave të dërguara për ekzaminim apo nga tytat e tjera.
Predha e gjetur në trupin e Nikës është e kalibrit 9 mm, ndërsa policia thotë se është qitur nga një armë zjarri Mp5.
