Prestigjiozja gjermane “Bild”, ka trazuar më tej politikën në Tiranë. Ajo ka publikuar pjesë të reja nga dosja “339”, ku kryebashkiaku në largim i Durrësit, Vangjush Dako, dyshohet si i përfshirë në blerje votash në zgjedhjet e vitit 2017, në bashkëpunim me eksponentë të krimit të organizuar. Opozita e konsideron përgjimin si legjitimim të protestave të saj, që synojnë largimin e qeverisë Rama.
Për mazhorancën, publikimet nuk sjellin asnjë të re, dhe Dako nuk mund të fajësohet vetëm nga një bisedë e përgjuar. Ajo kërkoi autorët e dekonspirimit të dosjes hetimore. Në sinkron me të, Prokuroria e Krimeve të Rënda, nxori një urdhër që kërcënon me burg gazetarët, që do të guxojnë të nxjerrin në të ardhmen detaje nga dosjet nën hetim.
Diskutimi në media i dosjeve hetimore, mund ta dëmtojë një çështje penale. Kjo dukuri ndodh për shkak të interesave të forta nga të dyja palët politike, dhe interesit të televizioneve për audiencë. Dhe publiku ndahet në llogore politike, ose nuk kupton asgjë tamam, dhe thjesht neveritet më tej nga politika.
Gjithsesi, transparenca edhe ashtu kaotike, apo edhe antiligjore e medias, është më e mirë sesa terri informativ, që ofron zyrtarisht organi i akuzës. Prokurorisë i janë vjedhur dhjetëra dosje penale në Durrës, në 2 grabitje para 1 viti. Për këtë skandal, nuk ka ende asnjë autor apo përgjegjës.
Shumë dosje hetimore, vazhdojnë të “flenë” në sirtarët e saj, me justifikimin e ngritjes së SPAK dhe Byrosë Kombëtare të Hetimit. Askush nuk kërkon një drejtësi popullore, të kryer portaleve apo paneleve televizive. Megjithatë, në këtë vend kanë ndodhur dhe po ndodhin shumë skandale. Dhe qytetarët kanë të drejtë ta dinë si qëndron e vërteta, përpara se të shkojnë në 30 qershor apo kurdoqoftë në kutitë e votimit.
Kështu, do të mësonin se kush janë “engjëjt”, dhe kush “djajtë” në këtë histori, dhe do t’i jepnin secilit atë që meriton./ Tirana Today
