Ish-kryetari i Bashkisë së Lushnjes, Fatos Tushe, ka hequr dorë nga shqyrtimi i çështjes së tij për shkarkimin nga detyra. Ish-kryebashkiaku i Lushnjës, Fatos Tushe, ka hequr dorë nga ankimimi në Gjykatën Kushtetuese.
Bëhet me dije se nëpërmjet avokatit, Tushe ka hequr dorë nga kërkesa e tij për rishqyrtim të vendimit për shkarkim nga detyra.
Teksa seanca ishte caktuar të mbahej ditën e sotme, njoftohet se ka dështuar për shkak të tërheqjes së Tushes. Ai u shkarkua nga detyra e kryetarit të Bashkisë Lushnje me vendim qeverie, pasi u arrestua më 6 korrik bashkë me ish-vartësit e tij për akuzën e “shpërdorimit të detyrës”.
Tushe do të vijojë të qëndrojë në burg, pasi Gjykata e Posaçme Kundër Korrupsionit ka rrëzuar për të katërtën herë kërkesën e tij për liri.
SPAK pretendon se ish-kryebashkiaku i Lushnjes, ka kryer shkelje për dhënien në favor të miqve tenderin prej 23 milionë lekësh.
Zyrtarët e Bashkisë së Lushnjës kishin pasur informacion për hetimet e SPAK, por sipas bisedave telefonike mes njeri-tjetrit, ata ishin të qetë, se Fatos Tushe kishte rregulluar gjithçka.
Veç abuzimit me tenderin, dosja përfshin edhe përgjime, ku Fatos Tushe ka shpërdoruar edhe tollonat e naftës së Bashkisë, duke furnizuar me karburant automjete të personave që nuk janë punonjës të Bashkisë, por miq dhe të njohur të tij.
