Kursi i këmbimit valutor u hap sot pa surpriza për euron, e cila ka mbetur në të njëjtin nivel, teksa shitet për 133.2 lekë dhe blihet me 133.8 lekë.
Megjithatë, euro mund të pësojë luhatje në varësi të zhvillimeve politike në Spanjë, të cilat mund të shkaktojnë dëmtime në një prej ekonomive më të mëdha të Eurozonës duke ndikuar negativisht tek aksionet, por edhe në kursin e këmbimit të euros, veçanërisht kundrejt dollarit amerikan.
Nga ana tjetër, dollari amerikan ka rikuperuar uljet, duke u ngritur me 0.6 lekë, teksa tashmë shitet për 113.3 lekë dhe blihet me 114 lekë.
Edhe paundi britanik ka një tendencë në rritje, teksa është shtrenjtuar me 0.4 lekë kundrejt monedhës vendase. Një paund shitet për 148.4 lekë dhe blihet me 149.3 lekë, ndërsa ekspertët financiarë presin që monedha të ketë luhatshmëri dhe nuk do të jetë surprizë nëse do të shitet sërish në nivelin e 152 lekëve, raporton Scan.TV.
Franga zvicerane ka vijuar rënien, duke u ulur me 0.3 lekë të tjera krahasuar me ditën e premte, pasi monedha shitet për 114.5 lekë dhe blihet me 115.5 lekë.
Në rënie është edhe dollari kanadez, i cili ka pësuar një ulje me 0.5 lekë. Ai shitet për 89.5 lekë dhe blihet me 90.5 lekë.
