Ish-Shefi i Shërbimit Britanik të Zbulimit, Richard Dearlove ka mbështetur hipotezën e presidentit amerikan, Donald Trump, se Kina është fajtore për përhapjen e koronavirusit.
Në një intervistë për Telegraf, Dearlove deklaron se COVID-19 është krijuar në një laborator në Kinë. Por sipas tij, përhapja ka qenë aksidentale. Ai shtoi se shkencëtarët i kanë bashkangjitur koronavirusit disa elementë kyçë në sekuencën gjenetike.
Duke iu referuar disa të dhënave të një studimi britaniko-norvegjez që ende nuk është publikuar, Dearlove theksoi se aftësia e infektimit të njeriut nuk ka ardhur për shkak të evolucionit natyror.
Shkencëtarët besojnë aktualisht se Covid-19 ka evoluar, duke shtrirë infektimet nga lakuriqët e natës tek njeriu. Por sipas Richard Dearlove, kanë qenë shkencëtarët kinezë ata që kanë kryer eksperimente tek lakuriqët e natës.
Sipas tij, disa prej tyre që kanë qenë të infektuar për të kryer eksperimente, mund të jenë larguar aksidentalisht nga laboratori i sigurisë së lartë në Wuhan.
Ish-Shefi i Shërbimit Britanik të Zbulimit paralajmëron se përpjekjet për gjetjen e një vaksine për koronavirusin mund të jenë të kota.
