Deputeti Vasil Sterjovski ka kërkuar shpalljen e 7 janarit si ditën e Krishtlindjeve. “Përmes këtij amendamenti, i propozoj Kuvendit shpalljen si festë zyrtare në Republikën e Shqipërisë së:
Datës 7 janar si dita e Krishtlindjeve sipas kalendarit Julian për pakicat kombëtare maqedonase, sërbe dhe malazeze të besimit ortodoks”, shkruhet në projektligjin e depozituar në Kuvend, në datën 16 dhjetor nga deputeti i opozitës.
Vasil Sterjovski erdhi deputet në Kuvend si pjesë e opozitës së re, nga listat e LSI-së, dhe përfaqëson minoritetin maqedonas në Korçë.
Ky është propozimi i dytë në lidhje me shpalljen e festave të reja zyrtare që vijnë nga deputetët e rinj që hynë në Kuvend pas lënies së mandateve nga PD dhe LSI. Ishte deputeti Myslim Murrizi, i cili kërkoi që 21 janari të shpallet festë kombëtare, në kujtim të 100 vjetorit të Kongresit të Lushnjës.
Propozimi i deputetit demokrat, Myslim Murrizi, për të shpallur 21 janarin ditën e mbajtjes së Kongresit të Lushnjës si festë kombëtare, është diskutuar edhe në Komisionin e Ligjeve. Madje ky propozim është shoqëruar me debate të forta.
“PS dhe PD shkojnë për dreka dhe darka për 21 janar në Lushnje. Ky propozim duhet të ishte bërë që në Parlamentin e parë pluralist, për ta shpallur festë kombëtare datën e mbajtjes së Kongresit të Lushnjës. Nuk kam ardhur këtu për të korrigjuar historinë. Kjo datë është para se të ndaheshim në komunistë dhe ballistë”, tha Murrizi.
