Dje në sheshin para Kryeministrisë u mblodh një grup militantësh, shumica ish-funksionarë të qeverisë së Berishës. Ndonëse në prapaskenë flitej për trazira, dhe se kjo protestë ishte alibi për zaptuar PD-në, Berisha vendosi që të largohej drejt banesës së tij. Protesta zgjati rreth një orë, dhe përveç fjalës së mbajtur nga disa individë, nuk pati asnjë zhvillim tjetër.
Në fjalën që mbajti në podium, Berisha sulmoi Ramën për “Ballkanin e Hapur”. Ai e akuzoi se po bëhet palë me Serbinë, ndërsa lëshoi dhe kërcënime. Gjatë protestës së Berishës janë djegur katër flamuj të Serbisë.
Policia e Tiranës ka arrestuar dy persona, ndërsa janë proceduar në gjendje të lirë gjashtë të tjerë. Strukturat e Policisë së Shtetit bënë kapjen dhe shoqërimin e tetë personave, që u përfshinë në veprimtari të kundërligjshme gjatë zhvillimit të protestës në bulevardin “Dëshmorët e Kombit”.
Në përfundim të veprimeve të kryera nga strukturat hetimore të policisë, u bë arrestimi në flagrancë i shtetasve A. C., 41 vjeç, banues në Tiranë dhe B. B., 56 vjeç, banues në Krujë. Këta shtetas, gjatë zhvillimit të protestës pasditen e djeshme, në bulevardin “Dëshmorët e Kombit”, para Kryeministrisë, kanë djegur katër flamuj kombëtar të Serbisë.
Njoftimi
Tiranë/Dogjën 4 flamuj kombëtar të Serbisë, vihen në pranga 2 shtetas, procedohen penalisht në gjendje të lirë 6 të tjerë.
Strukturat e Policisë së Shtetit, pas provave të grumbulluara, bënë kapjen dhe shoqërimin e 8 personave që u përfshinë në veprimtari të kundërligjshme gjatë zhvillimit të protestës në bulevardin “Dëshmorët e Kombit”.
Në përfundim të veprimeve të kryera nga strukturat hetimore të Policisë u bë arrestimi në flagrancë i shtetasve: A. C., 41 vjeç, banues në Tiranë dhe B. B., 56 vjeç, banues në Krujë.
Gjithashtu u proceduan penalisht në gjendje të lirë 6 shtetas të mitur të moshës 15 e 16 vjeç, banues në Tiranë dhe në Durrës.
Këta shtetas, gjatë zhvillimit të protestës pasditen e djeshme, në bulevardin “Dëshmorët e Kombit”, para Kryeministrisë, kanë djegur katër flamuj kombëtar të Serbisë.
Materialet procedurale u referuan në Prokurorisë pranë Gjykatës së Shkallës së Parë Tiranë, për veprime të mëtejshme, për veprat penale “Nxitja e urrejtjes ose grindjeve” dhe “Poshtërimi i Republikës dhe i simboleve të saj”.
