Sekretari i Pëgjithshëm i PD, Gazment Bardhi ka reaguar pas mbrojtes që kryeministri Edi Rama i bëri Ministres së Shëndetësisë, Ogerta Manastirliu.
Kjo e fundit, tha dje në Kuvend se nëse mbingarkohen spitalet, do zgjidhet se kush do trajtohet i pari.
Sipas Bardhit, kryeministri Rama nuk zhgënjeu edhe sot pasi është gjithmonë gati për të mbrojtur krimin dhe korrupsionin.
Bardhi thotë se ajo çfarë ka thënë Manastirliu, është reflektim i situatës ku e ke zhytur Rama vendin.
Postimi i Bardhit në Facebook
Edi Rama nuk zhgënjeu edhe sot! Është gjithmonë gati për të mbrojtur krimin dhe korrupsionin. Sa më shumë përkeqësohet situata e pandemisë, aq më jashtë realitetit shfaqet Edi Rama dhe aq më i zellshëm është në mashtrime dhe videomontazhe. Përpiqet të mashtrojë shqiptarët se nuk panë atë që panë dhe nuk dëgjuan atë që dëgjuan nga Ministrja e tij e Shëndetësisë: “Nëse kemi mbingarkesë në spitale, do të përballemi me zgjedhjen se kush do të trajtohet i pari”.
Ajo çfarë ka thënë Ministrja e Shëndetësisë është reflektim i situatës ku e ke zhytur Edi Rama vendin. Vetëm për të mos hequr dorë nga vjedhja me inceneratorët, koncesionet e tenderat Edi Rama i ka lënë shqiptarët të vetëm përballë krizës shendetësore dhe asaj ekonomike.
Propaganda e egër e Edi Ramës nuk fshin dot faktet:
- Sot në sistemin shëndetësor publik mungojnë tamponët për testim.
- ISHP vonon deri në 10 ditë përgjigjet e tamponëve.
- ISHP nuk ndjek zinxhirin e infektimeve për të ndaluar përhapjen e tij.
- Njerëzit nuk marrin kurim derisa shtrohen në gjendje kritike.
- Shqipëria ka numrin më të ulët të testimeve në Europë, numrin më të ulët të mjekëve dhe kapaciteteve spitalore.
Të gjitha këto janë përgjegjësi direkte e dështimit të Edi Ramës dhe Ogerta Manastirliut, që paguhen me shëndetin dhe jetën e qytetarëve.
Me propagandën dhe videomontazhet e Edi Ramës humbasin njerëzit e zakonshëm.
