Më 11 maj, Franca pritet që të vendosë në zbatim fazën 2 për lehtësimin e masave shtrënguese.
Në këtë fazë pritet që të ketë një hapje të disa bizneseve dhe institucioneve të ndryshme. Mirëpo nuk do të jetë e njëjta gjë në lidhje me hapjen e shkollave dhe universiteteve. Edhe pse Macron pati konfirmuar se këto institucione do të hapen më 11 maj, vendimi është shtyrë.
Sipas informacioneve të mediave franceze, duke cituar burime pranë presidentit shkollat do të qëndrojnë të mbyllura ta paktën deri në qershor.
Kryeministri i Francës, Edouard Philippe pritet të paraqesë ditën e sotme në parlament planin e daljes nga bllokimi.
Kujtojmë se Franca renditet si vendi i katërt më i prekur në botë nga koronavirusi, pas SHBA-ve, Spanjës dhe Italisë. Që nga shpërthimi i pandemisë, në Francë janë regjistruar 165,842 raste infektimi dhe 23,293 viktima.
