Pas një zhurme të madhe që u krijua me nisjen e punës së shërbimit urban, pakënaqësitë kanë dalë në dritë që në ditët e para. Qytetarët janë shprehur më herët se kanë frikë të lëvizin me urban për shkak të pandemisë, e ndërsa Shoqata e Transportit Ndërqytetas ka një sërë kërkesash të cilat ende nuk janë realizuar.
Sekretari i Shoqatës së Transportit Ndërqytetas, Adriatik Memushi, ka deklaruar për A2 se do të pezullohet puna, nëse nuk rishikohen kërkesat e tyre. “Do ta pezullojmë punën nëse nuk plotësohen kërkesat”, tha Memushi.
Kreu i shoqatës, Kujtim Mema, tha se po i dëmton transporti informal i paligjshëm, ndërsa Bashkia u kërkon pagesën e taksave, pasi i kishte premtuar se taksat do të shtyheshin deri në dhjetor.
“Na erdhën në zarfa taksat e Bashkisë, kur na u premtua se do shtyheshin deri në dhjetor. Duam të rishikohet kjo taksë. Terminali i Jugut ka kosto, pasi shoferët sillen rrotull duke harxhuar karburant. Shteti të ulë TVSH-në në 6%”.
