Sikundër e do tradita, të rinjtë e LRI janë mbledhur sërish në Jalë. Por në krahasim me vitet e shkuara, Monika Kryemadhi nuk ka qenë e pranishme. Kryetarja e LSI-së, gjatë muajve të fundit ka qenë pak aktive në rrjetet sociale.
Pavarësisht humbjes së thellë më 25 prill, LSI ka mbledhur edhe këtë vit në një kamping në Jalë të rinjtë mbështetës të kësaj partie, ku të pranishëm ishin Petrit Vasili, Endrit Braimllari, Erisa Xhixho e Floida Kërpaci.
Kryemadhi ka transmetuar LIVE në Facebook organizimin, por pa sqaruar arsyet se pse mungonte në këtë aktivitet. Prej kohësh, Kryemadhi nuk është shfaqur në publik. Mungesa e saj në këtë kamping, shton edhe më shumë pikëpyetjet për pozicionin në këtë parti, dhe nëse do të vijojë ta udhëheqë sërish atë edhe pas disfatës së 25 prillit.
13 tetor 2020/ Kryemadhi: Do të marrim 100 mandate
Kryetarja e LSI-së Monika Kryemadhi, teksa ka qenë ftuar në studion e “ABC News”, foli për 25 prillin dhe qeverisjen e kryeministrit Edi Rama.
“Ne sot jemi forcë e dytë e kampit opozitar. Unë garoj për të fituar gjithmonë, nëse fitoj apo jo atë e vendosin qytetarët. Nuk e kam parë veten si forcë e dytë apo e parë”, u shpreh Kryemadhi. Për Kryemadhin, opozita e bashkuar merr 100 mandate me Kodin e ri zgjedhor.
22 prill 2021/ Zhgënjimi i qytetarëve nga premtimet e Kryemadhit
Në 22 prill 2021, në takimin përmbyllës të fushatës elektorale të Lëvizjes Socialiste për Integrim, kryetarja Monika Kryemadhi shrehu bindjen se do të marrin më shumë se 11 mandate.
Kryemadhi tha se do të shkatërrojnë Rilindjen. Kryetarja e LSI e cilësoi 25 prillin si referendum që do të sjellë fundin e tranzicionit të gjatë.
“25 prilli do të jetë referendumi i mbarë popullor, për ti dhënë njëherë e përgjithmonë fund këtij tranzicioni. Prandaj vota juaj ka rëndësi për të shkuar për numrin 6. 25 prilli do t’ju kthejë qytetarëve shqiptarë sovranitetin e tyre. Vetëm vota e shqiptarëve është ajo që bën ndryshimin.
Qeveritë dhe qeveritarët janë kalimtarë, me 25 prill do t’i jepni fund përdorimit të pushtetit nga individët. Vetëm vota juaj është pushteti më i fortë”, ka thënë ajo.
“Më shumë se 11 mandate në Tiranë, sepse besoj tek ekipi i mrekullueshëm i LSI. Besoj te puna juaj e përditshme. Në 25 prill do të shkatërrojmë Rilindjen, sektin anti-kombëtar”.
25 prill 2021/Kryemadhi: Opozita e bashkuar fiton 85 deri në 90 mandate, LSI merr 28-30
Kryemadhi bëri projeksionin e saj të fitores, pak pas mbylljes së procesit të votimit. Ajo tha se opozita e bashkuar ka fituar 85 deri në 90 mandate. Ndërsa LSI, sipas saj, ka 28 deri në 30 mandate.
LSI mori 4 mandate
Këto zgjedhje sollën disfatën më të madhe elektorale të LSI-së, e cila është “zhdukur” nga harta elektorale në 9 qarqe të vendit, pasi në 25 prill mori vetëm 4 mandate. Në zgjedhjet e 2017, LSI-ja mori 225 975 vota ose 14,28%, përkthyer në 19 mandate. Pas katër vitesh nën drejtimin e Monika Kryemadhit, në zgjedhjet e 25 prillit 2021, LSI ka marrë vetëm 4 mandate, rreth 110 mijë vota ose 6.82 %. Pas katër vitesh, LSI-ja ka humbur më shumë se sa gjysmën e mbështetësve.
TIRANA TODAY
