Kreu i qeverisë, Edi Rama, ka mbledhur mesditën e sotme kabinetin qeveritar për fjalën përmbyllëse të përfundimit të mandatit të dytë. Teksa ka bërë një bilanc të situatës, kryeministri Edi Rama tha me krenari se mandati i dytë mbyllet mjaft pozitivisht, duke përmbushur objektivat që kishin vendosur. Ai i referohet dy sfidave, të tërmetit dhe pandemisë. Në të njëjtën kohë, Rama ripërsëriti thirrjen ndaj qytetarëve që të vaksinohen, pasi infektimet janë në masë.
“Mbyllet me një notë pozitive besoj unë, puna e një mandati të vështirë ku tërmeti dhe pandemia diktuan një forcë të pashembullt ndryshimi e prioriteteve tona qeverisës. Edhe nuk ka mbaruar pandemia dhe as ka përfunduar rindërtimi, por me të dyja kemi marrë një avantazh të konsiderueshëm.
Përtej konsideratave dhe kritikave për menaxhimin e dy krizave, do të jetë në gjurmët e historisë së qeverisjes në këto 30 vite. Kemi ende fatalitete nga pandemia fatkeqësisht, por këto janë edhe një mësim domethënës për rëndësinë jetike të vaksinimit. Askush prej atyre që marrin frymë nga respiratorët nuk është i vaksinuar, ndërkohë që disa të vaksinuar nuk shfaqin shenja të rëndimit të gjendjes dhe të kenë nevojë për intubim.
U bëj apel atyre që të bëjnë vaksinën dhe të mos humbasin kohë dhe të heqin mendime të gabuara se Pfizer bën dhe Sinovac jo. Vaksina duhet të bëhet patjetër”, tha Rama.
