Ka kaluar më shumë se një javë që nga momenti kur Operacioni Forca e Ligjit ka nisur goditjen e të ‘fortëve’, në kontrollin e pasurisë që dyshohet se e kanë vënë në rrugë të jashtëligjshme.
Operacioni Forca e Ligjit vijon me të njëjtën intensitet për sekuestrimin e pasurive të personave që dyshohet se e kanë vënë në rrugë të inkriminuar. Deputeti socialist Alket Hyseni, ka deklaruar në studion e “Report Tv” se as zyrtarët e shtetit nuk do të shpëtojnë nga sita e Operacionit Forca e Ligjit.
Ai tha se qëllimi primar është lufta pa kompromis. Ai i mëshoi fort faktit se operacioni në fjalë, nuk përjashton asnjë nga zyrtarët e shtetit, të cilët kanë qenë të lidhur me krimin. Sipas tij, askush nuk është i paprekshëm.
“Operacioni është rezultativ. Kuptoj që janë operacione delikate, që do të ruajnë liritë e individëve. Unë jam vetëm optimist, që do të kemi një superoperacion. Personi që hetohet dhe gjykohet për armëmbajtje pa leje, pas një viti mund të hetohet për diçka tjetër.
Qëllimi jonë është luftë pa kompromis. Operacioni nuk përjashton asnjë nga zyrtarët e shtetit që kanë suportuar krimin direkt apo indirekt. Askush nuk është i paprekshëm”, tha Hyseni.
