Kryeministri Edi Rama e ka nisur ditën sot me një mesazh nga Papa Françesku, në lidhje me situatën e krijuar nga koronavirusi.
Në mesazhin e Papës i bëhet apel njerëzve që të luten për veten e tyre dhe të afërmit. Por më së shumti thotë ai duhet lutur për autoritetet, pasi janë ata që në këto raste duhet të marrin vendime dhe masa, që tjerëve mund të mos u pëlqejnë.
“Le të vijojmë të lutemi për të sëmurit, të afërmit e tyre, për prindër me fëmijë në shtëpi, por kryesisht do t’ju kërkoja të luteshit për autoritetet. Ata duhet të marrin vendime dhe masa që njerëzit mund të mos i pëlqejnë por kjo është për të mirën tonë”, thuhet në mesazhin e Papës, të shpërndarë në Facebook nga kryeministri Rama.
“Fjalë të shenjta”, shkruan Rama përkrah fotos.
E gjithë Shqipëria tashmë është në izolim për shkak të përhapjes së koronavirusit vdekjeprurës në vend.
Deri më tani numri i pacientëve të infektuar ka shkuar në 33, ndërsa është shënuar edhe viktima e parë nga ky virus.
Shumica e bizneseve në vend janë mbyllur, ndërsa edhe qarkullimi i makinave është izoluar deri të paktën në fund të fundjavës.
Kryeministri Rama ka paralajmëruar marrjen e masave të tjera më të rrepta, nëse do të jetë e nevojshme.
