Në një prononcim për gazetarët nga selia blu, kryedemokrati Lulzim Basha tha se 95% e demokratëve e duan në krye të betejës. Nga ana tjetër, Berisha vijon takimet në kuadër të lëvizjes që ka nisur pas përjashtimit të tij nga grupi parlamentar i Partisë Demokratike, me vendim personal të kryedemokratit, Lulzim Basha. Përtej lumit të akuzave që vijnë nga kjo “Foltore”, Lulzim Basha ka qenë i palëkundur në vendimin e tij, duke thënë se Berisha ka plan të shndërrojë PD-në në një bunker antiamerikan për interesat e tij, dhe se nuk do e lejojë.
“Nga sondazhet e mia, 95% e demokratëve duan të udhëheq betejën ndaj Rama-Doshi-Rakipi, e të udhëheq betejën për të dalë nga llumi i trazicionit.
Kam dalë më shumë se çdo kryetar i PD-së në këtë 30 vite, e do dal përsëri. Unë nuk jam nga ata që shfrytëzoj momente të tilla, për të bërë garë se kush e ka autokolonën më të gjatë e kush i mbush sallat më shumë, se e di që ajo është një garë e lehtë për mua.
Nuk dua ta vendos z. Berisha në një pozitë inferioriteti. Situata dihet fare mirë. Vendimmarrja ka ardhur pas një vendimmarrje të SHBA-së. Interesit më të mirë të demokratëve dhe të nesërmes së shqiptarëve, të cilës nuk mund t’i shërbehet pa një PD të fortë, nuk i shërben përçarja e partisë për interesa personale të Bashës, edhe as të Berishës.
Kjo është arsyeja pse jam vetëpërmbajtur e do vazhdoj të vetëpërmbahem, me besimin se siç jam i qartë unë e demokratët, janë të qartë edhe shqiptarët. Inatçorëve iu them se rruga pa krye ku janë futur, dhe abuzimit që i bëjnë, do iu vijë me faturën që s’ua kam dhënë këto tetë vite, politik sigurisht”, u shpreh Basha.
