Kryeministri Edi Rama paralajmëroi se do ta hedhë në gjyq kryeministrin në detyrë të Kosovës, Ramush Haradinaj. Ky i fundit, kohë më parë, deklaroi se udhëheqësit Thaçi-Vuçiç-Rama planifikuan të grabisnin 10 miliardë euro fitime nga miniera e Trepçës përmes ndarjes territoriale të Kosovës.
Lidhur me këtë akuzë, shefi i qeverisë u shpreh se homologu i tij “gënjeu në mënyrën më të paskrupullt”.
“Në Gjykatat e Kosovës zotëria do të duhet të vijë të provojë akuzën për 10 miliardë që do ndaheshin në tavolinë midis meje, Hashim Thaçit dhe Presidentit të Serbisë. Por një gjë ditë të them unë, këtyre lloj politikanëve bravo u qoftë që gjejnë dhe bëjnë i them unë…
Dmth që ti thuash një populli që ishin 10 miliardë në sofër dhe do të ndaheshin midis këtyre të treve që ranë dakord të ndanin Kosovën dhe të marrësh akoma vota… Ata që votojnë për këtë lloj politike ato qofshin dhe bravo u qoftë”, nënvizoi Rama, teksa ishte i ftuar në emisionin “Opinion”.
