Kryeministri Edi Rama ndodhet në Pukë, ku po mban një takim me banorë të zonës, si pjesë e ciklit kombëtar “Bashkia që duam”.
Gjatë këtij takimi, Rama nuk la pa komentuar disi edhe vendimin e opozitës për djegien e mandateve. Duke iu referuar opozitës, Kryeministri tha se “ata dalin nga binarët sa herë afrohen zgjedhjet”, dhe gjejnë të gjitha mënyrat për t’i ikur ballafaqimit me zgjedhësit.
Rama tha se kjo që po ndodh nuk është aspak mirë për vendin, ndërsa shton se qeveria e ka zgjedhur rrugën e saj të vetme.
Madje, kryeministri paralajmëroi se kurdo që të përballen në zgjedhje, opozita jo vetëm që do lihet nga populli aty ku është, por edhe do të zvogëlohet.
Fjala e Ramës:
Kujt shqiptari mund t’i besohet se këta që flasin për vjedhje votash janë zgjidhje e nuk janë problemi? Pikërisht se janë problemi u larguan dhe nuk janë zgjidhja. Kjo është arsyeja përse sa herë afrohen zgjedhjet, ata dalin nga binarët. Të gjitha janë mënyra për t’i ikur ballafaqimit me zgjedhësit. Vendimet mbi kush qeveris dhe kush është në opozitë i marrin qytetarët. Më e bukura është se flasin për zgjedhjet e shkuara, po kush e ka harruar se në zgjedhjet e shkuara ata ishin në qeveri, kishin ministrin e brendshëm, kishin institucionet. Si na lejuan t’i vjedhim votat, jua dhamë, i thamë merrini të gjitha ama me një kusht: të njihni zgjedhjet. I morën të gjitha, por nuk i njohën zgjedhjet sepse nuk kanë shanse t’i fitojnë zgjedhjet.
Ngatërrojnë qytetarët me ata që zgjedhin për të ushtruar dhunë.
Shumë keq për ta, aspak mirë për vendin, por ne nuk kemi zgjidhje tjetër, rruga jonë është ajo që ka përcaktuar populli shqiptar në zgjedhje. Të tjerat janë të thjeshta për t’u kuptuar sepse e kam thënë, për sa kohë do vazhdoni të mendoni se shqiptarët do i bëni për budallenj, shqiptarët do ju lënë aty ku e keni vendin madje do zvogëloheni.
Në zgjedhjet e ardhshme, mbajeni mend, populli shqiptar jo vetëm do i lërë aty ku janë, por edhe do i zvogëlojë. /Tirana Today
