Largimi i opozitës nga Parlamenti nuk do të sjellë pasoja vetëm në jetën politike në vend. Por, ndikim do të ketë edhe në xhepat e vetë deputetëve. Kjo pasi të ardhurat mujore për shumë prej tyre do të jenë zero, pasi nuk kanë të deklaruar asnjë formë tjetër sesi mund të fitojnë të ardhura. E për të tjera rroga si deputet ka përbërë të ardhurat kryesore.
Pas bërjes publike të këtij vendimi, ministrja e Shtetit për Marrëdhëniet me Parlamentin, Elisa Spiropali shkroi se çdo e keqe e ka një të mirë, duke iu referuar rrogave që merrte opozita.
“Sinqerisht nuk do ta dëshironim kurrsesi degradimin e tyre konstant, po në këto kushte, duhet pohuar, kjo e keqe e ka një të mirë: Nuk do t’i marrin më rrogat për ta ndotur Parlamentin me baltë e bojë!”, – ishte ky komenti i bërë nga Spiropali.
Edhe pse ende nuk dihet fati i karrigeve bosh të lëna nga opozita, një prej skenarëve më të mundshme është që të nisë zëvendësimi i deputetëve që lanë mandatin me kandidatët që nuk fituan në zgjedhjet parlamentare të qershorit 2017. Dhe në rast se asnjë prej tyre nuk do të pranojë mandatin, sipas Kodit Zgjedhor 43 deputetët opozitarë do të zëvendësohen me kandidatë nga lista e PS. Por, kjo gjë do të sillte një situatë edhe më kaotike në vend. Ndërkohë që institucionet ende janë duke u marr me procedurat ligjore, Tirana Today pyeti qytetarët se ku duhet të shkojnë ato paga të lëna nga opozita. Të cilat për të gjithë duhet t’i marr populli, veçanërisht kategoria e pensionistëve dhe të varfrit.
“T’ia japin pensionistëve se janë gjynah. Sepse për këtë kategori nuk kujtohet asnjë lloj qeverie dhe asnjë lloj partie. Por, unë kam frikë se nuk do të ngelen bosh, do shkojnë t’i marrin të tjerët që janë tashmë në Parlament.”
“Ato lekë duhet t’i marrë populli. Janë lekë që duhet të shkojnë te kopshti, te fëmijët dhe tek ata që nuk kanë para e janë në nevojë.”
“Për çfarë e dua unë rrogën e atyre deputetëve, ata janë injorantë, gjynah si kanë shkuar në atë Parlament. Fëmijëve të shkollës edhe mësuesit i thonë që të mos bëhen si deputetë. Këtu ka arritur kultura e deputetëve shqiptarë.”
“Ato lekë duhet të shkojnë për njerëzit, për popullin e thjeshtë. Në fillim duhet të shpërndahet tek të varfrit. Pastaj nëse janë të rregulluar ato, do ishte mirë të më jepnin e mua pak.”
Ndërkohë të tjerë janë më skeptik ndaj kësaj skemë, ku sipas tyre ato para do të shkojnë në xhepat e qeverisësve.
“Edi Rama t’i marrë, atij i takojnë. Nuk i mjafton rroga e vetë se është gjynah i shkreti, fukara. Unë nuk e dua rrogën e tyre, është mëkat ajo rroga e tyre.”
“Hiç do i vjedhin vetë, do i marrin ata, ku lënë gjë. Ai i gjati do t’i marrë, nuk ngopen asnjëherë ata. Dhe pse kanë rrogat e veta, prapë do kërkojnë të marrin edhe pagat e lëna nga opozita.”/ TIRANA TODAY
