Flakët që shkrumbuan një banesë sot në Tiranë, ishin vendosur nga djali i shtëpisë. Nënë e bir u hodhën nga kati i tretë, për t’iu shpëtuar flakëve të zjarrit, por në fakt çdo gjë ka qenë e qëllimshme.
Tashmë janë publikuar edhe pamjet kur 36-vjeçari Klodjan Osmenaj i vendos zjarrin apartamentit ku jetonte bashkë me nënën në zonën e “Astirit” në Tiranë. Djali pasi i vuri zjarrin shtëpisë ka dalë në ballkon, dhe shikon si e përpinë flakët gjithçka që kishte brenda.
Fqinjët kanë thënë se e ëma Hava Osmenaj nuk pranoi që të zbriste nga kati i tretë pa marrë djalin, i cili nuk dilte se kishte frikë policinë. Por të dy mbetën brenda duke u bllokuar nga flakët, dhe në fund u detyruan të hidheshin nga kati i tretë për të shpëtuar.
Si pasojë e plagëve, e moshuara ndërroi jetë në spital, ndërsa djali është në gjendje të rëndë. Ai dyshohet se vuan nga problemet mendore.
Nënë e bir u hodhën nga kati i tretë për t’i shpëtuar flakëve që përfshinë apartamentin, por fatkeqësisht 62-vjeçarja ndërroi jetë ndërsa djali i saj 36-vjeçar ndodhet në spital nën kujdesin e mjekëve. Ngjarja ndodhi në zonën e Astirit, herët në mëngjes në orën 05:55 dhe ishin fqinjët të parët që ndjenë tymin dhe njoftuan policinë dhe forcat zjarrfikëse.
Sipas dëshmive të banorëve, zjarri dyshohet të jetë i qëllimshëm. Djali, Klodjan Osmenaj, sipas banorëve të pallatit vuante nga depresioni, dhe kjo ka shtuar dyshimet, ndërkohë nuk janë konstatuar rrjedhje gazi.
