Ish-ministri i Jashtëm, Ditmir Bushati ka folur nga Shkodra për situatën politike në vend, pas prezantimit të kandidatit të PS për bashkinë Shkodër, Valdrin Pjetri.
Duke iu referuar bojkotit të zgjedhjeve nga ana e opozitës, Bushati tha se PS do kishte preferuar të kishte përballë një kundërshtar, megjithatë vendimi nuk është zgjedhje e mazhorancës, por e vetë opozitës.
“Lidhur me këtë që po bën opozita kjo nuk është zgjedhja jonë. Do kishim preferuar që përballë të kishim kundërshtar, procesi deri më tani ka qenë i hapur. Ne jemi përgatitur me takimet që kemi bërë dhe mendoj që kur vjen puna për Shkodrën kemi shume se çfarë të propozojmë dhe aq më tepër duke pasur parasysh gjendjen në të cilën ndodhet bashkia Shkodër.
Nga ana tjetër nuk do të reshtim dhe do t’i bëjmë thirrje qytetarëve që të marrin pjesë në procesin zgjedhor që të mbështesin Valdrinin dhe ekipin tonë të Partisë socialiste”, deklaroi Bushati.
