KLGJ ka vendosur për përfundimin e mandatit të gjyqtarit të Gjykatës së Lartë, Ardian Dvorani. Anëtarët kanë vendosur me 6 vota pro përfundimit të mandatit të Ardian Dvoranit, ndërsa 3 prej tyre kanë qenë kundër.
KLGJ iu kërkoi mendim ndërkombëtarëve, për çështjen e Ardian Dvoranit, pasi Kreu i Shtetit Ilir Meta, me dokumente zyrtare kërkonte që ky institucion të shprehej për mbarimin e mandatit të këtij gjyqtari. Sipas Metës, Ardian Dvoranit i ka mbaruar mandati, dhe ky post duhet të merret nga një tjetër person.
Relatorja Marcela Shehu është shprehur se Dvoranit i ka mbaruar afati Kushtetues, për të pritur pasardhësin. Sipas saj, qëndrimi i tij në detyrë cënon parimet e Kushtetutës.
“Dvoranit i ka mbaruar afati Kushtetues për të pritur pasardhësin. Qëndrimi në detyrë mbi afate, rrezikon dhe cënon parimet e Kushtetutës“, tha Shehu.
Ndërkohë njëri nga anëtarët, Alban Toro, kërkoi që Këshilli të shprehet dhe të konstatojë mbarimin e detyrimit të Dvoranit, për të qëndruar në gjykatë. Mendim të kundërt shfaqi Brikena Ukperaj, e cila u shpreh se detyrimi i Dvoranit për të qëndruar në Gjykatën e Lartë nuk ka mbaruar.
“Detyrimi i Dvoranit për të qëndruan në Gjykatën e Lartë, nuk ka mbaruar. Detyrimi i Dvoranit mbaron në momentin e përzgjedhjes së anëtarit të 4, që vjen nga radhët e juristëve të spikatur”, tha Ukperaj.
