Teksa në Tiranë, studentët janë përplasur me forcat e policisë, pasi u pengohet pjesëmarrja në auditore, në universitetin e Korçës hyrja është e lirë. Zëvendësrektori i Universitetit të Korçës, “Fan Noli”, në një dalje në media është shprehur se edhe studentët e pa vaksinuar do të futen në auditore, por ata do të udhëzohen më pas drejt vaksinimit. I pyetur se nëse rektorati po shkelte urdhërin e Ministrisë së Arsimit, Zv. rektori Artur Adili tha se nuk mund të privojnë studentët.
“Nuk mund të privojmë studentët nga mësimi, por do t’i udhëzojmë për t’u vaksinuar. Pra, po respektojmë autonominë e universitetit”.
Edhe në Elbasan e Gjirokastër, studentëve me ose pa vaksinë u janë hapur dyert e auditoreve.
Dita e parë e vitit të ri akademik nisi me tensione në Fakultetin e Shkencave të Natyrës në Tiranë. Studentët e pa vaksinuar kanë shpërthyer në revoltë të hapur, pasi nuk lejohen të hyjnë në Fakultetin e Shkencave të Natyrës. Kjo ka sjellë përplasje mes tyre dhe punonjësve të sigurisë, të cilët kanë thërritur në ndihmë dhe efektivët e policisë.
Studentët janë detyruar që të vaksionohen, për tu futur në auditore, ose në të kundërt duhet të tregojnë testin PCR, që vërteton se nuk janë të infektuar me Covid.
