Kryeministri Edi Rama ka falenderuar Shtetet e Bashkuara të Amerikës që përmes NATO-s i dhuruan vendit tonë 60 respiratorë të rinj, pajisje vitale për pacientët e prekur nga koronavirusi.
Rama tha se miku i mirë duket në ditë të vështira, ndërsa paralajmëroi se bazuar te parashikimet e ekspertëve, dimri do të jetë i vështirë.
SHBA i ka ardhur në ndihmë Shqipërisë, duke dhuruar 60 respiratorë të rinj, të cilët do të instalohen në spitalin Infektiv, Shefqet Ndroqi dhe në 2 spitalet e reja COVID.
“Miqtë e mirë duken në ditë të vështira. Ne sot ndihemi jashtëzakonisht mirë, jo vetëm në aspektin ushtarak, por mbi të gjitha në aspektin human.
Jemi pjesë e këtij klubi fantastik vendesh që besojnë te vlerat e lirisë, parimet e demokracisë.
Mirënjohje SHBA-së, që gjithnjë edhe në këtë rast, janë treguar të vëmendshëm ndaj Shqipërisë.
Falenderoj në mungesë ambasadoren Kim, që më dha e para lajmin për këtë mbështetje kaq të çmuar dhe kaq të nevojshme në këtë fazë përballje me një armik kaq të pamëshirshëm.
Mbase ky është momenti i duhur, për të bërë edhe një retrospektivë të disa momenteve, kur kemi prekur nga afër mbështetjen e miqve tanë. Dimri do të jetë i vështirë sipas parashikimeve të ekspertëve të botës dhe Shqipërisë”, tha ai.
