Avram Shkelzen i njohur me nofkën “Drakula” ka qenë ‘koka’ e një bande grabitësish shqiptarë dhe italianë, të cilët mes viteve 2015-2017 kanë vjedhur dhjetëra banesa në Rivergaro, Piacenza dhe Podenzano.
33-vjeçari shqiptar, që prej muajit dhjetor të vitit 2017 ishte në arrest shtëpie.
Ai kishte marrë dy dënime; ishte dënuar me 3 vite e gjashtë muaj pasi akuzohej për disa vjedhje në Valtrebbia. Më pas në nëntor të 2018, shqiptari u dënua me procedurë të shkurtuar me 6 vite e 4 muaj, vendim i cili u ankimua nga mbrojtja.
Ndërkohë, Gjykata e Apelit e Bolonjës, pranoi kërkesën e avokatit mbrojtës Mauro Pontini dhe, masa e sigurisë nga dënimi me burg, u kthye në shërbim vullnetar në një famulli të Romagës. Prifti dha dakordësinë e tij dhe tashmë shqiptari do të ndihmojë në famulli dhe do të shpërndajë ushqimet në një kuzhinë.
Banda me 10 anëtarë kishte arritur “të pastronte” disa shtëpi nga bizhuteritë, pikturat, paratë dhe çdo gjë tjetër me vlerë. Të përfshirë në bandë ishin dy shtetas italianë, një rumun dhe 7 shqiptarë.
