Takimi mes zyrtarëve të Kosovës dhe Serbisë do të zhvillohet më 2 shtator në Washington.
Lajmin e ka konfirmuar vetë kryeministri i Kosovës, Avdullah Hoti, përmes një postimi në rrjetet sociale.
“SHBA ka qenë gjithmonë vendimtare në procesin e shtetndërtimit të Kosovës. Më 2 shtator takohemi në Shtëpinë e Bardhë për të diskutuar me palën serbe, si dy vende të pavarura, për projekte madhore të bashkëpunimit ekonomik që do ta ndërrojnë perspektiven ekonomike të Kosovës dhe rajonit. Kosova është e bekuar me miqtë që ka”, shkruan ai.
Ky është takimi i dytë që është organizuar nga i dërguari i Shtëpisë së Bardhë për këtë dialog, Richard Grenell.
I pari, i planifikuar për 27 qershor, u anulua pak ditë para mbajtjes, meqë Zyra e Prokurorit të Specializuar me seli në Hagë paraqiti, një aktakuzë për krime lufte ndaj presidentit të Kosovës, Hashim Thaçi, i cili ishte i ftuar në takimin e Uashingtonit.
Megjithatë, dialogu mes këtyre dy shteteve ka rinisur më 16 korrik në Bruksel.
