Konferenca e Donatorëve ka arritur të mbledhë plot 1.15 miliard euro për Shqipërinë.
Paratë e grumbulluara do të shfrytëzohen për përballimin e dëmeve të tërmetit të 26 nëntorit që goditi Shqipërinë dhe la pas 51 viktima.
Rama, i emocionuar, ka deklaruar në Bruksel se Konferenca e Donatorëve i ka kaluar pritshmëritë e tij.
“Kjo është një wow, fakti që unë nuk kam një fjali më vete e tregon. Ndërkohë që po vinim këtu po spekulonim pasi nevoja ishte kaq e madhe.
Në qoftë se arrijmë tek 40% e të gjithë shumës mund të kthehemi në shtëpi pa ankth, po të arrinim 50% mund të ndiheshim se kishim arritur një sukses.
Kjo është përtej imagjinatës së shfrenuar, nuk di ç’të them, por më lejoni të jem mistik se në ç’mënyrë tjetër mund të shpjegoj këtë. Më lini të citoj diçka nga Bibla, Korinthët ku thuhet “Në një frymë u pagëzuam nga një trup e të gjithë pimë nga e njëjta frymë. Nëse një pjesëtar nderohet të gjithë gëzohen”.
Dhe ndërsa citoj Biblën, edhe Papa Francesku e ka pagëzuar, por nuk mund të rri pa cituar edhe Kuranin. “Njerëzimi është një komb i vetëm”, tha Rama.
