Presidenti i Republikës, Ilir Meta ka reaguar pas skandalit të ndodhur në kryeqytet, ku disa punonjës të Policisë Bashkiake, dhunuan një të moshuar i cili ishte shitës ambulant, dhe i hodhën në rrugë produktet që tregtonte.
Meta e dënoi me forcë sjelljen joprofesionale, shproporcionale, të dhunshme dhe të dënueshme ligjërisht, dhe i bëri thirrje Bashkisë Tiranë që të zbatojë me përpikmëri të ligjit, të drejtat themelore të njeriut.
Ndër të tjera, Meta u shpreh se rdhëruesit dhe autorët e këtyre akteve arbitrare, meritojnë të marrin përgjigjen e menjëhershme nga drejtësia.
Postimi i Metës në rrjetin social, Facebook
Dënoj me forcë sjelljen joprofesionale, shproporcionale, të dhunshme dhe të dënueshme ligjërisht të disa punonjësve të Policisë Bashkiake Tiranë ndaj të moshuarve, shitës ambulantë. I bëj thirrje Bashkisë Tiranë, që në mënyrën më të papërgjegjshme ka dhënë edhe në të kaluarën e afërt shembullin më të keq të marrëdhënies së pushtetit vendor me qytetarët, të bëjë kujdes maksimal në zbatimin me përpikmëri të ligjit dhe të ketë parasysh se liritë dhe të drejtat themelore të njeriut garantohen nga Kushtetuta e Republikës së Shqipërisë në çdo kohë dhe duhen respektuar nga çdo institucion dhe autoritet. Urdhëruesit dhe autorët e këtyre akteve arbitrare, që po kthehen në një fenomen të përsëritur dhe thellësisht shqetësues për banorët e kryeqytetit, meritojnë të marrin përgjigjen e menjëhershme nga drejtësia!
