Kreu i Dhomës Amerikane të Tregtisë, Mark Crawford ka paralajmëruar sonte qeverinë shqiptare se bizneset amerikane ikin nga Shqipëria nëse vijohet me rritjen e taksave.
Në një lidhje direkte për emisionin “Studio e Hapur” në News24, Crawford tha se niveli i taksave në rajon dhe mundësia për investime është me e favorshme në vendet e rajonit në krahasim me Shqipërinë. Ai tha se niveli i taksave duhet të jetë stabël dhe nëse investitorët nuk janë të kënaqur mund të ikin.
Crawford shton se çdo muaj që ka një ndryshim dhe shtim taksash nuk është mirë.
“Ne kemi publikuar indeksin e Dhomës Amerikanë të Tregtisë dhe shqetësim mbetet niveli i taksës. Për ne të huajt është më e thjeshtë sepse ne nuk votojmë dhe nëse nuk jemi të kënaqur ne ikim. Ne po ndjekim me kujdes situatën dhe jemi duke krahasuar nivelin e taksave me rajonin. Unë kam pasur takim me përfaqësues në Shkup dhe ata janë më të stabilizuar në krahasim me Shqipërinë sa i përket nivelit të taksave. Nuk po krahasohemi me shtete të tjera si Norvegjia, etj.
Unë kam dëgjuar se nëse taksat janë stabël ne mund t’i përballojmë dhe nëse ka ndryshime edhe investitorët kanë probleme. Çdo muaj që ka një ndryshim dhe shtim taksash nuk është mirë. Taksat nuk duhet të ndryshojnë shpesh, por duhet të jenë stabël”- tha kreu i Dhomës Amerikane të Tregtisë.
