Janë zbardhur emrat e zyrtarëve rusë të cilët janë shpallur “non grata” në Shqipëri si kundërpërgjigje ndaj Rusisë për përdorimin e gazit nervor ndaj ish-spiunit rus në Mbretërinë e Bashkuar.
Kryeministri Edi Rama ka njoftuar se Shqipëria do bashkohet me shtetet që kanë rënë dakord për të dëbuar diplomatët rusë dhe shtetasë të tjerë që kanë shkelur “interesat kombëtare”.
Ministria e Jashtme i komunikuar vendimin Ambasadori rus në vendin tonë Aleksander Karpushin. “Sot, në datë 26 mars 2018, në Ministrinë për Evropën dhe Punët e Jashtme u thirr Ambasadori i Jashtëzakonshëm dhe Fuqiplotë i Federatës Ruse në Republikën e Shqiperisë, SHTZ Aleksander Karpushin, të cilit i’u komunikua nota verbale për shpalljen si persona të padëshirueshëm të dy diplomatëve rusë, veprimtaria e të cilëve nuk përputhet me statusin e tyre diplomatik” thuhet në njoftimin e MPJ-së.
Faktor.al ka mësuar nga burime diplomatike në Tiranë se një prej të shpallurve non grata është Ushtarak, kolonel Vladislav Filipov dhe oficeri tjetër i inteligjencës ruse të GRU, S.K, raporton faktor.al
Në vitin e fundit ambasada ruse në Tiranë ka rritur me 40 vetë personelin në Shqipëri, sidomos duke njerrë në terren atashehë kulturorë në zonën Pogradecit dhe Korçës. Në takimet e fundit, kreu i politikës së Jashtme të BE Federica Mogherini dhe stafi i saj janë alarmuar nga aktiviteti i shtuar rus në rajon, duke instruktuar selitë e BE të monitorojmë prezencën me raporte.
Në këtë mënyrë, Qeveria shqiptare u bashkohet aleatëve të NATO-s për të dëbuar disa diplomatë rusë nga vendi pas helmimit të ish-spiunit rus në Britaninë e Madhe.
Po sot Presidenti amerikan Donald Trump autorizoi dëbimin e 60 agjentëve të dyshuar rusë nga Shtetet e Bashkuara. Zyrtarët e lartë të administratës thanë se 48 “oficerë të njohur të zbulimit” në konsullatën ruse në Seattle dhe 12 të tjerë në misionin rus në Kombet e Bashkuara kanë shtatë ditë afat për t’u larguar nga vendi.
“Shtetet e Bashkuara e ndërmarrin këtë veprim së bashku me aleatët dhe partnerët tanë në gjithë botën, si përgjigje ndaj përdorimit nga ana e Rusisë të armëve kimike për përdorim ushtarak në tokën Britanike”, tha zëdhënësja e Shtëpisë së Bardhë Sarah Sanders. Polonia, Gjermania dhe Lituania njoftuan gjithashtu se edhe ato po dëbojnë diplomatë rusë lidhur me helmimin në Britani.
